Lima ka panibag-o nga mga suspected illegal pipelines na naman ang nakutkutan sang Mines and Geosciences Bureau sa White Beach sa isla sang Boracay sini nga adlaw.
Una nga nakutkutan sang grupo ni Dr. Soccoro Manzano ang pipeline nga may kalabaon nga 28-metro sa atubang mismo sang Don Vito Ristorante Italiano sa Station 2 nga nakasentro ang punta sang tubo sa dagat.
Depensa naman sang nagadumala sa establisemento nga wala na naghatag sang pangalan sa Bombo Radyo nga wala sang nagailig nga tubig sa nasambit nga pipeline bangud ginagamit lamang nila ini sa tagsa ka may mga okasyon sila sa diin diri nagailig ang ila nga electrical wires.
Sunod nga nakutkutan ang pipeline sa bahin sang Hennan Regency Resorts and Spa nga apisar wala sang nagailig nga tubig may nagausbong naman nga mabaho nga baho sa puno sang tubo nga nakutkutan.
Samtang nadiskubrehan sang mga taga MGB ang tatlo ka nagadikit nga mga pipelines nga nakutkutan sa atubang sang Le Soleil de Boracay Hotel sa diin may nagailig pa nga mahigko nga tubig sa nawasak nga tubo.
Nagkuha na ang Environmental Management Bureau sang water sample sa nagleak nga tubig agud mapaidalum sa laboratory analysis.
Hatagan sang DENR sang tion ang nasambit nga establisemento komersyal nga magpaathag angut sa natukiban nga mga pipeline malapit sa ila nga mga edipisyo.
