DUMARAO CAPIZ – Yara na sa istable nga kondisyon, ang duha ka indibidwal nga napilasan matapos ang nagluntad nga aksidente nga ginakalakipan sang 4 ka mga salakyan subong man ang patrol car sa Poblacion Ilaya, Dumarao, Capiz.
Matandaan nga ang nasambit nga insidente ang ginakalakipan sang isa ka Mitsubishi Fighter nga salakyan, Toyota Hiace, Truck Van kag nakaparada nga patrol car sang Dumarao MPS.
Sa pagpakig-angut sang Bombo Radyo sa OIC sang Dumarao Municipal Police Station nga si PCapt. Tobias Garfin, ginpahayag sini nga sang samtang ginasubay sang nasambit nga mga behikulo ang dalan aksidente nga natumba ang Mitsubishi Fighter nga may karga nga tubo kung sa diin aksidente man ini nga nabungguan sang Truck Van nga nagasunod.
Suno kay PCapt. Garfin, samtang nagapatigayon sang responde sa nagluntad nga insidente kung sa diin gintinguhaan nga butungon kuntani ang truck van nga nagdasok sa likod sang Mitsubishi Fighter, hinali lamang nga nabugto ang kable nga ginagamit.
Bangud takason ang dalan, nag-atras ang truck van kabangdanan nga naulamid man ang nagasunod nga Toyota Hiace kalakip pa ang nakaparking nga patrol car sang Dumarao MPS.
Dugang pa ni Garfin nga natigayon lamang nga makapundo ang mga behikulo matapos nga bumunggo sa poste sang kuryente.
Mahibaluan nga naglab-ot sa pito ka mga persona ang naulamid sa insidente kung sa diin duha diri ang nag-angkon sang minor nga pilas.
Panugyan sini publiko, agud malikawan ang kasubong sini nga insidente mas maayo nga maghalong sa pagmaneho sang salakyan.
