Mga personnel sa pinakadaku nga military base sang US sa Middle East, ginapawagan nga mag-evacuate bangud ginaalegar nga ginakonsidera sang Trump administration nga maghimo sang military action batuk sa Iran

Pila ka mga personnel sang US military Al Udeid Air Base sa Qatar ang ginpanugyanan nga mag-evacuate.

Ang lihok ang kasunod sang pahayag ni US President Donald Trump nga mahimo magpatunga sila sa nagapadayon nga maduguon nga hublag-protesta sa Iran.

Ginpasalig naman sang Qatar nga padayon ang ila paghalong agud indi maglala ang tensyon sa nasambit nga rehiyon.

Nahibaluan nga ang Al Udeid amo ang pinakadaku nga base sang US sa Middle East nga may 10,000 ka mga soldado.

Matandaan nga sang nagligad nga tuig sang naglunsyar sang airstrike ang US sa Iran, pila ka mga personnel kag ila pamilya ang gin-evacuate sa Middle East.

Nagpanugyan naman sa mga Pilipino ang embahada sang Pilipinas sa Qatar nga mangin alerto.