ROXAS CITY – Ginkumpirma sang isa ka pinoy nurse nga naba-se sa Houston, Texas nga padayon ang pag-alabutan sang bulig para sa mga evacuees nga nagapabilin pa sa mga evacuation shelters.
Sa interview ng Bombo Radyo Roxas kay Mr. Paul Osorio, katapu sang Houston Pinoy Gun Club kag nagabulig sa mga nagakinahanglan, ginpahayag sini nga pila ka lugar sa Houston, Texas ang naghubas na ang tubig baha kag nakabalik na sa ila nga mga balay ang pila ka pamilya kag sa tulong sang iban nga charitable institution, ginabuligan sila nga kaayuhon ang nagkalaguba nga balay.
Suno pa kay Osorio nga nagabuligay ang tanan humalin sa US government tobtob sa pribado nga organisasyon para mapabatyag sa naapektuhan sang bagyo nga Harvey nga sarang sila nga makabangon sa nasambit nga kalamidad.
Madamo man nga mga pinoy volunteer workers nga nagabulig sa mga nagamasakit nga ang iban yara sa mobile hospital kag tanan ang masaku sa pagbulig sa mga nagakinahanglan.
Apang nag-apelar sang pangamuyo sa mga Capizeño si Osorio para sa mga naapektuhan sang bagyo nga Harvey, bangud suno diri nga mabudlay ang ila nga sitwasyon labi na ang mga nadulaan sang puluy-an kag mga mahal sa kabuhi.
