CAPIZ- Ginapreprahan subong sang Capiz Provincial Health Office (PHO) ang nagkalain-lain nga mga programa agud masigurado ang kaluwasan kag kasadyahan sang publiko subong nga Holiday Season.
Sa interview sang Bombo Radyo kay Mr.Joeffry Espiritu, Information Officer sang Capiz Provincial Health Office, iya ginpahayag nga ang katuyuan sang kampanya nga “Ligtas Christmas 2025” amo ang mangin handa ang tagsa ka pamilya sa ano man nga krisis ukon emerhensya kag malikawan ang nagkalain-lain nga balatian.
Suno kay espiritu, may yara sang tatlo ka sub-campaigns ang ginaduso sa subong nga tuig, ini amo ang “BiyaHealthy” nga kun sa diin ginpahunumduman ang publiko sa responsable nga pagmaneho kag mga paghalong sa karsada, “Tamang Pagkain” sa diin ginaganyat balance diet agud makalikaw sa balatian nga kasubong sang diabetes kag hypertension, subong man ang pagsunod sa insakto nga pagtinlo kag paglikaw sa bisyo nga ilimnon kag sigarilyo kag ang “Iwas Paputok” nga nagapahanumdon sang paggamit sang luwas kag alternatibo nga fireworks sa pihak nga tradisyunal nga paputok.
Pahayag pa niya, kinahanglan nga ipabilin nga matinlo ang pagpreparar sang pagkaon, kalakip ang masami nga paghugas sang kamot agud malikawan ang paglapta sang mikrobyo.
Ginsiling man sang natungdan nga agud malikawan ang poisoning, kinahanglan nga i-separate ang hilaw kag luto nga pagkaon, maggamit sang malimpyo nga tubig, kag usisaon ang expiration date sang mga panakot. Kinahanglan man nga likawan ang exposure sang pagkaon sa mainit nga lugar sang masobra duha ka oras agud indi ini madasig nga magban-os.
Reported by Bombo Francis Biñas
