ROXAS CITY – Hugot sa karon nga ginapatuman ang Enhanced Community Quarantine (ECQ) sa Barangay Culasi, Roxas City.
Ini ang lihok sang konseho sang amo nga barangay kasunod sang pag-positibo sa rapid test sang asawa sang chief tanod sang amo nga lugar.
Suno kay Barangay Kagawad Enrico Joseph, talalupangdon ang hugot nga kooperasyon sang mga pumuluyo.
Indi pa sini mapat-od kun ano ka lawig nga ipaidalom sa ECQ ang nasambit nga barangay bangud kinahanglan pa hulaton ang resulta sang Real-Time Polymerase Chain Reaction ukon RT-PCR test sang nasambit nga persona.
Mahibaluan nga ang 66 anyos nga ginang nga nagpositibo sa rapid test ang wala sang travel history sa guwa sang probinsiya.
Ini ang residente sang Sitio Sacup kag nagapabilin karon sa Roxas Memorial Provincial Hospital.
Ini bangud nakabatyag sang pila ka mga sintomas sang COVID-19 ang amo nga ginang rason nga ginpaidalom ini sa RT-PCR test kag ginahulat pa ang resulta.
Ginpanugyanan naman ang iya mga himata nga iya naka-close contact nga magpaidalom sa strict-home quarantine.
Kahapon nga adlaw, gilayon nga nagpatigayon sang sinapol ang mga opisyales sang barangay kag nagpatigayon sang rekorida kun sa diin ginpahibalo sa mga pumuluyo ang pagpaidalom sa ECQ sa barangay.
Samtang, nagalab-ot naman sa 9 ang mga Locally Stranded Individual’s (LSI’s) nga naka-quarantine sa quarantine facility sang nasambit nga barangay.
Ginkompirmar man sang konsehal nga nga naga-work from home sa karon si Punong Barangay Teresa Almalbis bangud isa ini ka senior citizen.
Iya lamang ini nga ginatawagan kag ginakonsulta kun may mga importante sila nga pagahimuon sa barangay.
