Nagapabilin nga alerto ang mga residente sang Hawaii matapos nag-issue sang tsunami warning ang National Weather Service kasunod sang magnitude 8 nga linog nga nagtay-og sa Kamchatka, Russia.
Sa exclusive interview sang Bombo Radyo kay Hugh Talty, residente sang Hawaii, iya ginpahayag nga gilayon nabaton sang mga residente ang abiso nagikan sa otoridad nga mag-aligmat kag magpalayo anay sa shoreline.
Suno kay Talty, edukado kag nakahibalo na ang mga residente sang mga dapat ubrahon kun may yara sang tsunami warning bangud indi ini una nga bes nga nabaton nila ang amo nga paandam.
Kumpiyansa siya nga preparado ang Hawaii kun matabo ang tsunami ilabi na nga nagakooperar ang mga tawo sa mga pagsulundan sang otoridad.
Una na nga ginpahayag ni Governor Josh Green nga may yara sang tsunami wave nga na-measure malapit sa Midway Atoll sa tunga sang Japan kag Hawaii.
Ang wave height ang naga-measure sang anum ka tapak.
Gani nagpaandam ang gobernador sa publiko nga magpalayo sa dagat bangud delikado ang balod sa subong nga mga tinion.
