ROXAS CITY – Paga-imbitahan sang konseho sang siyudad ang mga supervising engineers sang Department of Public Works and Highways (DPWH) nga magtambong sa ila patigayunon nga sesyon agud magpaathag natuhoy sa estado sang pila ka mga nagapadayon nga road concreting ukon re-blocking projects sa siyudad sang Roxas.
Ini ang ginpahayag ni City Councilor Midelo Ocampo sa iya nga diskurso-pribiliheyo bangud sang houl nga natuga sang mga ongoing road projects sa Barangay Cagay kag Barangay Dayao, sining siyudad.
Suno kay Ocampo nga siya mismo ang personal nga naka-eksperyensiya sa tuman kagutok nga trapiko kun sa diin nagadugay sang halos tunga sa oras nga wala nagahulag ang mga salakyan bangud sang konstruksiyon sang karsada.
Ginpahayag ni Ocampo nga paga-usisaon sang konseho sang siyudad ang mga enhinyero kun may yara sila sang proper coordination sa City Engineers Office sa pagpatuman sang ila mga proyekto.
Usisaon man ang mga ini kun kumpleto sila sa mga early warning devices sa ila tagsa ka mga proyekto.
Nagakadapat man suno kay Ocampo nga may koordinasyon ang DPWH sa Traffic Management Unit (TMU) agud masolusyunan ang problema sa kagutok sang trapiko.
Kalakip sa mahimo nga solusyon sa amo nga problema suno kay Ocampo amo ang road re-routing.
