ROXAS CITY – Nagpatigayon sang impormal nga pagsinapol si Governor Fredenil “Oto” Castro, kaupod ang pila ka mga kaangut nga ahensiya natuhoy sa hibubun-ot nga ginpalab-ot sang pila ka mga mangingisda sa probinsya sang Capiz sadtong Biyernes.
Ini ang ginpahayag ni Hon. Jonathan “Sonny” Besa sang mainterview sang Bombo Radyo.
Kaupod sa nasambit nga pagsinapol ang mga representante sang Bureau of Fisheries and Aquatic Resources (BFAR), (Capiz Provincial Environment and Natural Resources Office (CaPENRO), provincial administrator, provincial legal officer, Philippine maritime, coastguard, kag representante man sang fisherfolks ukon mangingisda sa Brgy. Libas sining syudad.
Suno kay BM Besa, una nga nagpadulong sa iya ang mga mangingisda agud magreklamo sa pila ka mga layi nga nagalimita sa ila pagpangisda, kag gilayon nga ginpalab-ot niya ini sa talatapan sang gobernador.
Bangud diri, nagpatawag si Gov. Castro sang pagsinapol agud diskusyunan ang mga tikang kag solusyon agud mabuligan ang mga mangingisda.
Una nga reklamo sang mga ini ang pila ka nasyunal nga layi kun sa diin limitado lamang ang ila makadtuan nga kagadagatan, gani nangin agenda man ini sa ginhiwat nga sesyon kahapon nga adlaw sang sangguniang panlalawigan kun sa diin nagpapasar sila sang isa ka resolusyon nga nagahinyu sa Marina, BFAR, NTC, Phil. maritime kag Phil. Coastguard nga magpatigayon sang one-stop-shop registration sa bug-os nga fishing vessel sa probinsya sa Agosto 30-31 kag Setyembre 1-2.
Pagadiskusyunan man ang tatlo ka mga isyu nga rason sa pagpangdakop sa mga mangingisda kapareho sang wala sang permit gikan sa BFAR, troll fishing, kag dynamite fishing.
Dugang sini, ang makapangisda sa sulod sang 15 kilometros nga radius, kag mag-angkon sang inter- LGU agreement kun sa diin mahimo makapangisda sa nagkalain-lain nga kalalawran sa banwa sang Capiz, ang isa man sa pamaagi agud mabuligan ang mga mangingisda sa probinsya.
Naghiwat sa liwat kahapon nga adlaw sang pagsinapol si Gov. Castro kaupod ang Provincial Agriculturist Office kag BFAR para sa dugang nga diskusyon.
Mensahe ni BM Besa sa mga mangingisda, himuon niya ang kutob sang iya masaragan nga makabulig kag luyag niya nga ang mga programa sang probinsya ang makabulig man sa mangingisda kag padayon siya nga magahimo sang paagi agud mapahaganhagan ang ila pangabuy-anan.
