ROXAS CITY – Kasubong sang eksena sa pelikula ang natabo sa isa ka lodging house sa Barangay Baybay, Roxas City matapos nadakpan sa akto ni mister si misis nga may kaupod nga lalaki.
Sa exclusive interview sang Bombo Radyo Roxas kay barangay tanod Ricardo Besa, isa sa mga nagresponde sa pagpangayo sang bulig sang mister nga si Alyas Toto, madugay na ang nagalapta nga tsismis sa ila nga barangay sa banwa sang Sapian, nga may relasyon si Alyas Inday sa driver sang tricycle nga si Alyas Bobot nga amo ang ila nga ginakontrata sa pagdala sang ginabaligya nga saging kag uling sa Teodoro Arcenas Trade Center.
Nagkaisog lamang ang mister nga sundan ang misis humalin nga nagbiya ini sa ila nga balay tobtob sa pagbaligya sang ila mga produkto sa merkado, matapos nabatyagan ang pagbag-o sa iya sa tagsa ka magpaangga siya diri.
Wala ginalauman ni Alyas Toto nga matapos mabaligya ang ila mga produkto lodging house ang kadtuan sang duha.
Sa bulig sang mga opisyales sang Barangay Baybay napaguwa ang duha sa diin una nga nagguwa si Alyas Inday nga nagbuhi sang tinaga nga istorbo lamang sila sa iya nga kalipay nga ginkaakig sang iya ugangan kag bana.
Apang hinali nga nagbag-o ang maisog nga nawong ni alyas Inday sang makita ang tiya, sa diin naghibi ini kag nagpangayo sang pasaylo.
Samtang bangud sa kahuy-anan kag insulto sa iya nga pagkalalaki nagdesisyon si Alyas Toto nga pasakaan sang panumbungon ang misis kag driver sweet lover sini.
