ROXAS CITY – Dismayado nga nagdangop sa Bombo Radyo ang 48-anyos nga mister matapos nga wala nakabaton sang food packs kag tunga sa sako nga bugas sa Barangay Culasi, Roxas City.
Ginpahayag ni Mr. Joel Amarra sang Sitio Nipa Barangay Culasi sining syudad nga wala ini nakabaton sang food packs nga ginpanagtag sa nasambit nga barangay sa pihak nga nasunugan ini sang balay.
Gindugang pa sini nga wala man ini nakabaton sang tunga sa sako nga bugas nga ginpanagtag sang city government.
Suno kay Amarra nga nagasakit ang buot sini sang makita nga nakabaton sang tunga sa sako sang bugas ang iban nga residente samtang ini ang wala makabaton.
Samtang nagapati naman si Amarra nga may lamud pamulitika sa wala sini pagbaton sang mga ayuda bangud kontra partido ini sang punong barangay.
Ginpanindugan ni Amarra nga dako kuntani ang bulig sa iya sang ginpanagtag nga foodpacks kag ang tunga sa sako nga bugas bangud nag-untat ini sa pagtrabaho kasunod sang covid-19 disease.
