ROXAS CITY-Personal nga nag-atubangay sa estasyon sang Bombo Radyo ang 27-anyos nga mister kag ang ginareklamo nga misis nga nagpanakit sa iya kag naglampos sang tasa sa ulo sini sa Barangay Banica, Roxas City.
Liwat nga ginpanindugan ni Christian Michael Singh nga sumugod nga nadulaan ini sang trabaho bangud sang coronavirus disease (COVID-19) pandemic, nagsugod man ang pagpanakit sang sang iya misis nga si Mary Angel Singh.
Suno sa mister nga ginasumbag siya sang misis sa iya nga baba kag ginahampak kun siya ang magsabat sa ila ginaba-isan.
Suno pa diri nga ginlampusan siya sang tasa sang sang misis matapos nga nagduda nga ginbakal niya sang sigarilyo ang P7 nga iya ginhulam sa iya ugangan.
Wala suno diri nagpati ang iya misis nga ang P7 ang iya ginbayad sa kulang sa iya pagpa-load.
Naakig man ini bangud matapos nga ginlampusan siya sang tasa kag nagdugo ang iya ulo, wala gid siya gintatap sang pamilya sang iya nga misis.
Gindugang pa sang mister nga may yara sang tion nga ginsulod siya sa hulot kag ginhampak sang madamo nga beses sang iya misis kag natabo man nga ginpalayas ini.
Magluwas sa pagpanakit, ginpahayag pa sang mister nga masami siya ginahambalan sang malain nga mga tinaga sang iya nga misis kag ginabalik-balik sang tuad ang natabo sadto nga paggamit sini sang ilegal nga droga.
‘ANG DEPENSA NI MISIS’
Ginsabat sang 24-anyos nga misis ang tanan nga alegasyon sang iya mister nga pagpanakit kag pagtu-ad sang mga malain nga tinaga sa ila personal nga pag-atubangay sa Bombo Radyo.
Ginpahayag ni Mary Angel Sing nga sang umpisa, maayo pa ang pag-updanay nila sang bana sini nga si Michael Christian Singh kasunod sang ila nga pagpakasal kag pag-estar sa isa ka balay.
Apang pila ka bulan ang makaligad sang iya natukiban nga amat-amat nga nagabalik sa dati nga bisyo ang iya nga bana.
Suno sa kay Mary Angel nga masami niya nga nadadakpan sa akto ang bana nga may ginapasulod nga iban nga tawo sa ila kwarto nga may ginahimo nga indi maayo.
Nagduda ini nga nagbalik ang mister sini sa paggamit sang ilegal nga droga.
Gin-ako man sini nga masami niya nga ginasakit ang mister ilabi pa kun ginasaway niya ini sa mga kalainan nga iya ginahimo.
Suno pa diri nga ginsumbag kag ginhampak niya sang tsinelas ang iya bana sang iya ini nasimhutan nga mabaho sang sigarilyo.
Gin-ako man sini nga ginlampusan sang tasa ang ulo sang mister apang ginpanindugan nga indi niya hungod ang natabo.
Suno sa iya nga siya ang ginasukot sang P10,000 nga utang sang iya mister sa abyan sini apang sang nagkomprontahanay wala malikawan nga malumpusan sini sang tasa sa ulo ang mister sa tuman nga kaakig.
Samtang ginpanginwala man sini nga bangud nadulaan sang trabaho ang mister rason nga iya ini ginasakit.
Gin-athag ni Mary Angel nga bangud sa bisyo sang mister kag mga pasalig nga mangita sang trabaho ang ang ginatunaan sang ila away nga duha.
