ROXAS CITY – Yara na sa isa ka punerarya sa banwa sang Tapaz, Capiz ang isa ka 44 anyos nga mister matapos nga ginaalegar ginpatay kag ginlubong pa sa duta sa Barangay Roxas, Tapaz, Capiz.
Sandig sa inisyal nga imbestigasyon sang Tapaz Municipal Police Station, nadiskubrehan na lamang sang iya bata ang wala na ginhingadlan nga biktima nga wala na sang kabuhi kag nakalubong sa duta kun sa diin nagatuhaw pa ang ulo sini.
Nahibaluan nga may igo sa dughan, natuo nga abaga kag iban pa nga parte sang lawas ang nasambit nga biktima.
Base sa inisyal nga imbestigasyon sang mga kapulisan nga sadtong Pebrero 29 sining tuig, nagbiya ang biktima sa ila balay para kuntani magpangayam sa matalon nga lugar sa nasambit nga barangay.
Base sa pagpangusisa sang mga kapulisan sa mga residente sa lugar nga nakabati sila sang lupok sang armas luthang.
Nahibaluan nga may ka-umahan ang nasambit nga biktima sa nasambit nga barangay.
Padayon naman ang imbestigasyon sang mga kapulisan sa nasambit nga insidente.
