(UPDATE) – Wala sang malain nga rekord sa Barangay Mongpong, sini nga syudad, ang mister nga ginluthang-patay sang riding in tandem sa Barangay Banica, Roxas City.
Ini ang ginkumpirmar ni Punong Barangay Ricky Donato, sang mainterview sang Bombo Radyo.
Matandaan nga ginkilala ang biktima kay Nestor De Andres, 58-anyos kag residente sang Angelville Subdivision, Brgy. San Jose, sini man nga syudad apang may balay sa gihapon sa Brgy. Mongpong kag ginapulian man ini sang biktima.
Suno kay Kapitan Donato, nga ba-se sa iya pag-analisar, planado ang pagpatay kay De Andres bangud riding in tandem ang mga suspek.
May pila man ini ka impormasyon nga nabaton nga naulamid ang biktima sa isa ka krimen, 20-ka tuig na ang nakaligad.
Ba-se man sa iya pagpangusisa nga anay upline sang natunaw nga double you money investment scam si De Andres.
Apang, gin-athag ni Donato nga wala man ini sang matul-id nga rason kun ano ang motibo sang suspek bangud wala sang kontra sa ila barangay ang biktima.
Ginatugyan nalang sini sa mga otoridad ang pag-imbestigar sa nasambit nga insidente, kag nagalaum nga makuha sang pamilya ang hustisya sa kamatayon sang ila himata.
