Mister patay matapos nga ginluthang sang wala matumod nga mga suspek sa banwa sang Pres. Roxas, Capiz

ROXAS CITY-Patay ang isa ka mister matapos giluthang sang wala matumod nga mga suspek sa Barangay Bayuyan, President Roxas, Capiz.

Ginkilala ang biktima nga si Renjon Villa, 47 anyos sang Barangay Manoling sang nasambit nga banwa.

Sandig sa inisyal nga imbestigasyon sang President Roxas PNP, samtang sakay sa motorsiklo kag magapauli na kuntani ang biktima sang hinali na lamang ini nga ginluthang-patay sang wala matumod nga mga suspek.

Gilayon naman nga nagpalagyo ang mga suspek matapos ang insidente.

Narekober naman sa lugar nga ginluntaran sang krimen ang duha ka mga basiyo sang ginapatihan kalibre .45 nga armas-luthang.

Padayon naman ang imbestigasyon sang mga kapulisan agud nga matumod ang mga suspek nga responsable sa nasambit nga krimen