SAPIAN, CAPIZ – Pilason ang isa ka mister matapos ginlabu sang kaugalingon sini nga live-in partner bangud wala niya ini ginpartehan sang nabaton nga P6, 000 nga ayuda sa idalom sang Social Amelioration Program (SAP) sang Department fo Social Welfare and Development (DSWD) sa Barangay Maninang, Sapian, Capiz.
Ginkilala ang biktima nga si Romeo Alayon kag ang suspek naman amo si Romelyn Olano.
Sa interview sang Bombo Radyo kay Punong Barangay Gregorio Lavanza Jr., ginpahayag sini nga matapos mabaton ni Alayon ang kwarta, gilayon siya nga ginpadulungan sang live-in partner sini sa ila balay agud kuhaon ang iya nga parte sa amo nga ayuda.
Apang nagpamalibad ang biktima nga ihatag ang ginapangayo nga kwarta sang iya live-in partner bangud suno diri may yara sila sang kasugtanan nga dapat sa atubang sang Municipal Social Welfare and Development Office (MSWDO) officer ukon barangay officials sila magatunga-ay agud may yara sang testigo.
Apang posible nga ginkaakig ini sang ginang rason nga naghabuyanay pa ang mga ini sang pila ka mga kagamitan.
Diri kag hinali na lamang ginlabu ni Olano si Alayon gamit ang sanduko rason nga nag-angkon ini sang pilas sa lawas.
Gilayon naman nga gindala sa pinakamalapit nga ospital ang biktima agud madapatan sang nagakaigo nga pagbulong.
Nahibaluan pa nga masami nga wala nagakasugot ang maglive-in partner kag makapila ka beses naman nga ginpatawag sa barangay bangud sa ila nga pag-away.
