ROXAS CITY, CAPIZ – Ginaimbestigaran na sang Roxas City Council ang mga katapo sang City Ordinances and Regulations Enforcement (CORE) Unit bangud sa ginareklamo nga paglapas sa husto nga pagpatuman sang traffic rules sa syudad.
Sa interview sang Bombo Radyo Roxas kay City Councilor Fernando Luis Viterbo, Chairman sang Committee on Police, Fire and Peace and Order, iya ginpahayag nga nakalab-ot na sa iya ang video nga ginpadala sa istasyon kun sa diin makit-an ang tatlo ka enforcer nga nagapangayo sang cellphone number sang duha ka kababainhan nga sakay sang motorsiklo, imbes nga tagaan sila sang citation ticket bangud sa indi nila pagsuksok sang helmet.
Nahibaluan nga nag-angkon sang nagkalainlain nga reaksyon gikan sa publiko matapos ang amo nga insidente nga ginakabig indi patas nga pagpatuman sang layi kon kababainhan ang madakpan sa karsada nga nagabayolar.
Suno kay Viterbo, mapatigayon sila sang maid-id nga imbestigasyon agud matumod ang matuod nga rason sang isyu.
Ginpasalig man sini nga indi pagkunsintihon ang mga nagalapas kag ginpanawagan man niya sa publiko nga magtuman sa mga kasuguan sa trapiko.
Interviewed by: Bombo Jessa Mae Siman De Los Santos
