ROXAS CITY – Mahimo na maka-avail ang tanan nga mga miyembro sang Pag-IBIG Fund sang dugang nga duha ka bulan ukon 60-day grace period sa ila loan payments.
Ini ang ginpahayag ni Rolando E. Gilo, Officer in Charge sang Pag-IBIG Roxas Branch sang mainterview sang Bombo Radyo.
Suno kay Gilo nga nagalab-ot sa kapin 26, 000 ang mga miyembro sang Pag-IBIG sa probinsya sang Capiz.
Ginpahayag sini nga may yara sang gintanyag nga 60- day grace period para sa mga miyembro sang Pag-IBIG Fund sa tanan nga loan payments.
Ini sandig sa idalom sang Republic Act 11494 ukon ang Bayanihan to Recover as One Act (Bayanihan 2) kun sa diin nangin epektibo sadtong Setyembre 15 tubtob sa Nobyembre 14, 2020.
Ang 60-day grace period otomatiko sa tanan nga mga loan payments kalakip na ang Multi-Purpose Loan, Calamity Loan kag Housing Loan nga indi maglapaw sa siyam ka bulan nga wala kabayad.
Magluwas diri, nagatanyag man sang special loan restructuring ang Pag-IBIG fund para sa mga miyembro nga wala nakabayad sang utang bangud sa COVID-19 pandemic.
Dugang pa ni Gilo nga mahimo nga makabenepisyo ang mga wala nakabayad sa sulod sang anom ka bulan humalin sang nagsugod ang pandemya.
