Pilas ang naangkon sang maglive-in partner matapos aksidente nga ginbungguan ang ila ginasakyan nga motorsiklo sang kasugata nga salakyan sa national highway sang Barangay Poblacion Takas, Cuartero,Capiz .
Ginkilala ang mga sakay sang motorsiklo nga sanday alyas Cris, driver sang motorsiklo kag residente sang Barangay Lacaron Dao, Capiz, kag ang iya nga live-in-partner nga si alyas Rez, residente sang Barangay Bolo, Roxas City, samtang ginkilala naman ang driver sang salakyan sa kay alyas Joe, residente sang Barangay 1, Roxas City.
Sa impormasyon nga nakuha sang Bombo Radyo nagikan sa Cuartero MPS, ginpahayag nga nagikan sa syudad sang Roxas ang motorsiklo kag padulong sa syudad sang Iloilo sang aksidente sini nga nabungguan sang kasugata nga salakyan.
Nahibaluan nga nag-angkon sang pilas sa magkatuhay nga parte sang ila nga lawas ang maglive-in partner kag gilayon ini nga ginpadangat sa pinakamalapit nga ospital.
Sa karon, ginhilway na sa karsel ang driver sang salakay matapos nagtakop ang ila nga reglementary period of detention.
