ROXAS CITY – Nagahilibion sa kasakit ang 69-anyos nga driver sang motorsiklo matapos nga nag-angkon sang patal nga pilas sa iya tiil, bangud sa nagluntad nga aksidente sa national highway sang Barangay Bula, Mambusao, Capiz.
Ginkilala ang driver sang motorsiklo kay Alfredo Lema Alicaya Jr., mangunguma kag residente sang Brgy. Najus-an.Sakay sini ang mga backriders nga sanday Rolly Lavado, pastor kag 46-anyos, kag isa ka 12-anyos nga lalaki, nga lunsay mga residente sang Brgy. Poblacion Tabuc, sa nasambit nga banwa.
Samtang, ang driver sang Isuzu Giga Wing Van truck amu si Jaime Serrano Garcia 63-anyos, sakay ang mga pasahero nga sanday Jayson De Leon Rosal nga tag-iya sang truck kag ang helper nga si Gerry Adalid, mga residente sang San Jose Del Monte, Bulacan.
Sandig sa inisyal nga imbestigasyon sang traffic section sang Mambusao MPS, nagikan sa Manila kag padulong sa direksyon pa Iloilo City ang truck, apang pag-abot sa lugar, aksidente ini nga nasangit sang kasugata nga motorsiklo.
Sa dugang nga imbestigasyon sang mga kapulisan, ginapahayag nga nag-overtake ang motorsiklo sa isa ka salakyan kag naagaw ang linya sang kasugata nga truck, rason nga bumunggo ini diri.
Ginpadangat ang mga sakay sang motorsiklo sa Mambusao District Hospital, samtang wala naman napilasan ang mga sakay sang truck.
Sa karon, nakakustodiya ang magtimbang nga salakyan sa Mambusao MPS para sa nagakaigo nga disposisyon kag nagapadayon nga imbestigasyon.
