Motorsiklo nga ginpark sa guha sang balay, ginkawat sang wala makilan-e nga persona sa banwa sang Tapaz

Ginkawat ang isa ka motorsiklo sang wala pa makilan-e nga mga suspek samtang gina-park sa guha sang balay sang iya gina-ubrahan, sa Barangay Taft, sa banwa sang Tapaz.

Ginkilala ang biktima kay alyas “Rey”, 52-anyos,panday kag residente sang Barangay Lagdungan, Tapaz, Capiz.

Sandig sa impormasyon nagikan sa Tapaz Municipal Police Station, ginpahayag nga nagpadulong ang biktima sa istasyon agud magparekord nga nadula ang iya motorsiklo.

Dugang pa nga, nalipatan sang tag-iya  ang yabi nga naga-ungot pa sa motorsiklo kag posible gintuyo nga sakyan sang mga suspek.

Sa karon, padayon pa nga ginapangita ang amo nga motorsiklo kag padayon man ang imbestigasyon sang mga otoridad angut sa nasambit nga insidente.