ROXAS CITY – Ginklaro ni Mr. Jessie Baes Municipal Planning Officer sang Local Government Unit (LGU) sang Panay nga yara sa Local Inter-agency Committee ang desisyon nga pagpahalin sa mga pumuluyo nga ginbawian sang housing unit sa Panay Ville sumugod sang tinalikdan nga adlaw kag indi nagikan sa iya.
Sa interview sang Bombo Radyo kay Baes, ginpahayag sini nga antes paman ang nasambit nga pagpahalin sa mga pumuluyo una na sila nga nagpatigayon sang paghinun-anun kaupod ang nagkalain-lain nga ahensya sang national government kaangay sang National Housing Authority (NHA), Department of Human Settlements and Urban Development, Presidential Commission for the Urban Poor (PCOP), Department of Interior and Local Government (DILG), Philippine National Police (PNP) kag iban.
Suno kay Baes, nangin kaungdan sini agud i-relocate ang mga squatter sa Pawa fishport bangud sa development project, agud ma-manage ang problema Panay Ville, kag agud ma-isyuhan sang notice of award ang mga benepisyaryo sang housing sa lugar.
Ginpahayag man sini nga ang ila pagpahalin sa mga pumuluyo ang nag-agi sa proseso pinaagi sa guidelines sang NHA.
Mahibaluan nga ang amu nga resolusyon ang gin-aprubahan agud mapahalin ang mga illegal occupants sang amu nga mga units kun sa diin 13 nga mga indibidwal ang natigayon nga mapahalin.
Kadungan sa pag-apruba sang nasambit nga resolusyon ginpahayag ni Baes nga gilayon man nga gin-isyu ang mga notices sa 13 ka mga indibidwal sa 13 ka units.
Dugang pa ni Baes nga indi valid ang mga papeles nga ginapakita sang mga naga-istar sa unit nga may pirma sang anay administrasyon bangud wala sang otoridad nga magpirma sa amu nga dokumento sang NHA ang anay alkalde, wala sang official seal ang papeles, madamo sang mga certificate nga gin-isyu sa mga benepisyaryo nga gin-islan ang original nga tag-iya sang unit.
