ROXAS CITY – Naga-kaagnas kag nagapanimanaho na sang nasapwan ang bangkay sang 39-anyos nga lalaki kaina sang kaaganhon, Pebrero 17, 2024 sa kanipaan sa Barangay Marita, President Roxas.
Ginkilala ang bangkay nga si alyas ‘Ado’ residente sang amu nga lugar apang temporaryo nga nagapuyo sa Barangay Balighot, banwa sang Maayon.
Sa interview sang Bombo Radyo kay Ludivico Bermejo, amay sang biktima, suno diri katapusan sini nga nakit-an ang iya anak sang Martes, Pebrero 13 sa diin nagdul-ong pa ini sang inugbakal sang bugas antes naglaong nga mapauli na sa Maayon.
Pagkasunod nga adlaw nabalitaan na lang sini nga wala nakasapol sa gina-istaran sa Maayon si ‘Ado’.
Kasunod sini ang pila ka mga reklamo sang pumuluyo nga indi maayo nga baho nga nagahalinan sa katalunan.
Diri na ginkulbaan si Ludivico kag ginpadulungan ang katalunan kag didto nasapwan ang bangkay sang iya bata nga nagahuray-ad kag yara na sa advance state of decomposition ginabulubanta 3km ang kalayuon sa ila puluy-an.
Positibo man sini nga ginkilala ang angak sini ang biktima bangud sa ginapahayag suksok sang bangkay ang ginapanag-iyahan nga short.
Luyag naman sang pamilya nga ipaidalum sa autopsy examination ang bangkay sang biktima agud matumod kun ano ang gintunaan sang iya kamatayon ilabi na nga daku nga katingalahan kay Ludivico ang nakit-an nga buho sa may dughan sang iya anak.
Sa karon, nagapadayon pa ang imbestigasyon sang kapulisan angut sa insidente.
