Nagdaug nga mga kandidato sa Isla sang Panay nga padayon ang suporta sa NPA, ginpaandaman sang battalion commander sang PA

ROXAS CITY – Ginkumpirma sang battalion commander sang 61^st Infantry Battalion Philippine Army nga may 37 ka mga kandidato nga nagdalagan sang nagligad nga eleksyon sa Isla sang Panay ang nagasuporta sa mga terorista nga New People’s Army (NPA).

Suno kay Lt. Col. Joel Benedict Batara sa nasambit nga numero, 15 diri ang nagdaug sa ginpadalaganan nga  posisyon.

Kalakip sa suporta nga ginahatag sang wala ginhingadlan nga pulitiko ni Batara sa mga NPA amo ang kuwarta, armas kag iban pa nga kinahanglanon sang mga terorista nga grupo.

Ginpaandaman man sang opisyal ang nasambit nga mga kandidato nga untatan na ang paghatag sang suporta sa mga rebelde bangud kun magpadayon sila posible nga mapasakaan sila sang kaso bangud isa ini ka akto sang terorismo.