Personal nga nagpanawag kag nagpangayo sang bulig sa Bombo Radyo Roxas ang bata sang amay nga nalumos-patay sa isa ka resort sa banwa sang Dumalag.
Matandaan nga sang imbukada nga adlaw sang Enero sa sini nga tuig, nalumos-patay ang isa ka amay nga ginkilala kay alyas “Nito” 68-anyos kag residente sang Brgy. Poblacion, Bingawan, Iloilo.
Sa interview sang Bombo Radyo kay Irish Castillo, bata sang biktima, ginpahayag sini nga luyag nila nga mahatagan sang pagtamod kag maklarohan kun ngaman wala sang lifeguard ang amo nga resort nga kun sa diin wala matatapan ang ila sini nga amay kag nagresulta pa sa pagkalumos sini.
Aminado naman si Castillo nga wala nila madiparahan ang ila amay apang suno sa iya, natatapan pa kuntani ini kun may lifeguard lang nga naka-standby kag yara sa lugar.
Dugang pa ni Castillo, wala suno sa ila sang may nagpalab-ot sang kun ano nga assistance nagikan sa management sang amo nga resort.
Nahibaluan nga yara sa impluwensya sang makahulubog nga ilimnon ang biktima sang natabo ang insidente.
Samtang, bukas naman ang talatapan sang Bombo Radyo Roxas para sa mangin sabat sang management sang amu nga resort sa reklamo sang himata sang biktima batuk sa ila.
