CAPIZ – Nagpanawagan ang National Movement of Young Legislators nga pasabton ang mga responsable sa ginaalegar substandard nga flood control projects nga magguwa na sa mga hearing sang Senado kag Kamara.
Sa interview sang Bombo Radyo Roxas kay Capiz 1st District Board Member Jose Fulgencio “Pepe” del Rosario, Chairperson sang National Movement of Young Legislators Region 6, iya ginpahayag nga indi mabaton sang publiko ang sitwasyon bangud maathag nga ginagasto lang ang kwarta sang tawo sa mga proyekto nga indi man maayo ang pagkaayo.
Suno kay del Rosario, indi lang iban nga rehiyon ang naka-eksperyensya sang amo nga problema bangud mangin sa Capiz, may mga flood control project sang Department of Public Works and Highways nga indi na mapuslan batuk sa pagbaha.
Pahayag pa sang opisyal, nagakadapat nga magserbe nga leksyon ang nasambit nga kontrobersiya agud bag-uhon ang sistema sang implementasyon sang mga proyekto.
Dugang pa sang natungdan, kinahanglan sang mas hugot nga monitoring, transparency kag accountability halin sa mga ahensya sang gobyerno kag contractor agud masiguro nga dekalidad ang tanan nga proyekto kag mapuslan sa publiko.
