Ginaiimbestigaran sang National Bureau of Investigation ang posible nga pag-angot sang isa ka pulis sa pagpalapta sang sayop nga impormasyon may kaangtanan sa kinaroroonan ni Senador Ronald dela Rosa.
Ini matapos madakpan sang NBI ang isa ka lalaki nga nagpahayag nga may yara siya sang impormasyon parte sa ginatineran sang senador nga ginapangita bangud sang arrest warrant nga ginpagwa sang ICC.
Suno sa NBI, nagpakig-angot ang suspetsado sa mga opisyal sang gobyerno kag nag-angkon nga may importante ini nga impormasyon nga makabulig sa pagtultol kay Dela Rosa. Apang sa imbestigasyon sang ahensya, natalupangdan nga wala sang matuod nga basehan ang kadam-an sang iya mga pahayag kag nagasandig lamang ini sa mga impormasyon halin sa social media.
Sa iya pagdepensa, ginpahayag sang suspetsado nga may isa ka pulis nga nagsugo sa iya nga himuon ang amo nga tikang. Bangud sini, ginasusi na sang NBI kon may kamatuoran ang amo nga alegasyon kag kon may iban pa nga personahe nga nalakip sa pagpalapta sang sayop nga impormasyon.
Sa subong, nagaatubang ang lalaki sang reklamo nga estafa kag posible nga paglapas sa Cybercrime Prevention Act. Nagpahanumdom man ang NBI sa publiko nga may yara sang legal nga konsekwensya ang pagpalapta sang peke ukon malimbong nga impormasyon.
