Ginkilala sang Department of Information and Communications Technology ang National Bureau of Investigation matapos ang madinalag-on nga pagkadakop sang mga katapo sini sa tatlo ka indibidwal nga nadalahig sa hacking sa mga websites sang gobyerno.
Luwas sa websites, na-access man sang mga suspek ang pila ka mga bangko, private sector, mangin ang mga facebook accounts.
Suno sa ahensya, bisan ano nga oras naka-preparar ini sila nga maghatag sang asistencia sa NBI kag magatindog bilang technical consultant sini.
Magahatag man ini sang mga importante nga impormasyon nga makabulig sa pagpabaskog sang kaso kontra sa nagkaladakpan nga mga suspetsado.
Gin-athag man sang DICT nga parte man sila sang National Cybersecurity Interagency Committee nga kun sa diin may mandato ini nga maghatag sang intelligence kag technical information sa mga kaso.
Ginasiguro man sang ahensya nga magaupod ini sa pag-cooperate sa mga nagapanguna nga enforcement agency para sa pagdakop sa iban pa nga mga cybercriminal.
