ROXAS CITY – Nagreklamo sa Roxas City Police Station ang isa ka negosyante matapos ginaalegar tatlo ka tuig na nga wala nabalik ang iya gin-invest nga kuwarta sa isa ka doktor sa Aguinaldo Street, Roxas City.
Ginkilala ang tagareklamo nga si Mary Jane Aguason, 45-anyos sang Sitio Tambak, Barangay Dumulog sining siyudad.
Sandig sa alegasyon sang tagreklamo nga sang tinalikdan nga Hunyo 29, 2017 nagpadulong ini sa klinika sang ginareklamo nga si Dr. Ricardo Betita agud mag-invest sa Doc Betita Airbit Club kag nag-invest sang kapin P150,000.
Magluwas diri sang bulan sang Hulyo, nag-invest pa ini sang kapin P100,000 kun sa diin nagpromisa si Betita nga ibalik man ang nasambit nga kantidad matapos ang isa ka tuig.
Apang ginkadismaya ni Aguason nga tubtob subong wala pa sa gihapon nabalik ni Betita ang nasambit nga kantidad.
Bangud diri, ginpakamaayo na lamang sang tagreklamo nga ipabalhag sa Roxas City Police Station ang amo nga insidente.
