Patay ang isa ka negosyante matapos ginluthang sa Barangay Bitoon Ilaya, Cuatero, Capiz.
Ang biktima amo si alyas Ron, 57 anyos, kag residente sang nasambit nga lugar.
Samtang ang suspek naman amo si alyas Rem, 65 anyos, residente man sang nasambit nga barangay.
Sandig sa impormasyon sang Cuartero Municipal Police Station, masakay na kuntani sa iya nga tricycle ang biktima sang gilayon siya nga ginpalapitan sang suspek sa isa ka tyangge sa Barangay Bitoon.
Suno sa kapulisan, natirohan ang biktima sang isa ka bes sa iya nga abaga.
Bangud sini, natumba ang biktima apang gin-atake pa gid ini sang suspek gamit ang kutsilyo kag gin-gulgol ang liog antes magpalagyo sa wala pa mahibaluan nga direksyon.
Gindala pa sa ospital ang biktima apang gindeklara nga dead on arrival.
Sa subong, nagapabilin ng at large ang suspek kag nagapadayon man ang manhunt operation.
Ginalantaw sang kapulisan nga daan nga hiligut-anon ang rason sang pagpangluthang.
