Naglab-ot na sa 12 ang kumpirmado nga numero sang mga napatay sa makahalangusbo nga aksidente nga natabo sa Subic-Clark-Tarlac Expressway (SCTEX) toll plaza sa Tarlac City.
Suno kay Tarlac City Police Station chief, PLtCol Romel Santos, anom sa mga napatay puro mga menor de edad, samtang padayon sa gihapon nga nagapaayo ang 27 ka persona nga napilasan sa nasambit nga karambola.
Matandaan nga natabo ang aksidente alas 12:30 sang udtpo kahapon, May 1, samtang nagapundo ang pila ka salakyan sa northbound toll plaza sang SCTEX kun sa diin aksidente nga ginbungguan sang isa ka pampasahero nga bus ang isa ka SUV.
Sunod-sunod ini nga nakabunggo sa iban pa nga nakalinyada nga salakyan bangud sa kabaskugon sang impact.
Sa karon yara na sa kostudiya sang pulisya ang driver sang bus. Suno kay Col. Santos, gin-ako man sang driver nga napiyongan ini antes ang natabo nga karambola.
Magapangatubang ang nasambit nga driver sa kaso nga reckless imprudence resulting in multiple homicide, multiple physical injuries and damage to property.
Una na nga ginmandu sang Department of Transportation (DOTr) ang gilayon nga suspensyon sa operasyon sang Solid North Bus Transit Inc., ang bus operator nga imbolbado sa insidente.
