Pila ka mga tawo ang ginapatihan nga napatay kag masobra 100 ang napilasan matapos nagluntad ang sunog sa isa ka ski resort bar sang Crans-Montana, Swiss Alps, Switzerland, kadugangan sang selebrasyon sang Bag-ong Tuig, sang Enero 1, 2026.
Suno sa Cantonal Police sang Valais, may nabatian nga mabaskog nga paglupok resulta sang sunog, apang wala sang indikasyon sang terorismo sa lugar.
Madamo sa mga napilasan ang nag-antos sang grabe nga pagkapaso.
Bangod sini, napilitan ang mga awtoridad nga magbutang sang 10 ka helikopter, 40 ka ambulances, kag 150 ka rescue personnel agod atubangon ang makahaladlok nga hitabo.
Suno sa report, wala pa madeterminar sang mga otoridad ang ginhalinan sang sunog kag ginpahayag nga indi “explosive device” ang tuga sang mabaskog nga paglupok.
Dugang pa, wala pa sang kumpirmasyon nga impormasyon ang mga otoridad tuhoy sa nasyonalidad kag identity sang mga biktima.
Nahibaluan nga kilala nga popular sa mga turista ang amo nga ilimnan.
Sa karon, ginsirado na sang mga pulis ang lugar, kag nagbutang man sang no-fly zone.
Ginabuligan man sang mga otoridad ang mga pamilya nga makilala kag mabalik ang mga bangkay sang mga biktima bilang pagtahod sa ila.
