ROXAS CITY – Ginalauman kag ginahulat tubtob sa karon ang ginpromisa nga financial aid kag repatriation sang gobyerno sang Pilipinas sa mga OFW’s nga yara sa Sri Lanka.
Sa interview sang Bombo Radyo kay Mrs. Jovy Genite, Bombo International Correspondent sa Sri Lanka, ginsiling sini nga madugay na ang ila paghulat sa ginpromisa sang gobyerno kun sa diin mas kinahanglan nila subong bangud padayon ang pagtinaas sang balaklon kag nagakadulaan pa sang suplay amu man sa gatong.
Mahibaluan nga ginpapili sila suno diri sang gobyerno kun luyag nila magbaton sang $300 ukon magpuli, apang iya ginsiling nga mas pillion niya ang $300 bangud filipino passport holders lamang ang mahimo magpuli kun sa diin igabilin ang iya pamilya nga Sri Lankan nationals gani daku man ini nga problema sa kadam-an nga OFW’s nga may pamilya sa nasambit nga pungsod nga luyag kuntani magpuli.
Gintuad man ni Genite nga maayo nga pungsod ang Sri Lanka kun nadumala lang kuntani sang maayo sang pamilya Rajaspaka nga amu ang rason kun ngaman nabankrupt ang pungsod Sri Lanka.
Ginabulubanta 500-600 ang OFW’s sa nasambit nga pungsod nga kalaban may yara na didto sang pamilya.
Ginsiguro man sini nga indi magkabalaka ang ila pamilya diri sa Pilipinas bangud maayo ang ila kahimtangan nga mga Pinoy kag wala sila naga-upod sa mga protesta kun sa diin malapit sa katalagman.
Luyag sini ipalab-ot sa gobyerno nga kun mahimo padasigon ang pagbulig sa ila bangud mas kinahanglan nila subong ang bulig ilabi na sang pinansyal.
