ROXAS CITY – Wala makahibalo si Mr. Francisco ‘Bobot’ Dariagan kun tubtob san-o ini magapungko bilang OIC Provincial administrator matapos nga nag-file sang leave of absence (LOA) si Provincial Administrator Edwin Chinel Monares, epektibo sang Marso 21, 2022.
Sa interview sang Bombo Radyo sa pinuno sang Provincial Internal Audit Service Office, ginpahayag sini nga ang gobernador gid lamang ang makasiling kun tubtob san-o ini sa nasambit nga posisyon.
Wala man ini sang ideya kun ano ang rason sa pag-file ni Monares sang LOA, apang kun basehan suno diri ang nangin post sa social media sang administrador ‘personal reason’ ang ginpahayag sini.
Ginpasiguro man ni Dariagan nga indi maapektuhan ang iya pagdumala sang duha ka opisina sa Kapitolyo bangud natigayon sini nga matunga ang iya oras.
Indi man ini bag-o suno kay Dariagan bangud ini ang ika-duha nga kahigayunan nga nangin acting provincial administrator ini, una sang tion ni anay governor Victor Tanco, Sr. nga nagdugay sang anum ka bulan.
Ginapahayag man ni Dariagan nga nakighinala na ini kay Monares, apang may kaangtanan sa preparasyon sang CAPIZtahan subong nga bulan sang Abril, promotion kag pasuweldo sang mga empleyado kag iban pa nga administrative concern sang mga opisina sa Kapitolyo.
