ROXAS CITY – Kumpirmado nga nagsarado ang Online Sabong Betting Station sa Sitio Centro, Barangay Poblacion, Ivisan, Capiz, matapos ang mandu ni Presidente Rodrigo Duterte nga untaton na ang operasyon sang e-sabong sa Pilipinas.
Sa interview sang Bombo Radyo kay Punong Barangay Nico Yap, ginpahayag sini nga nakumpirmar man sini nga nagsarado ang gina-arkilahan nga puwesto sang Betting Station, sang Lunes nga adlaw.
Suno sa Kapitan, nga makabatyag gamay ang ila barangay bangud mabuhinan ang pagdahog sang mga baligya sa kaiping nga balaligyaan sang betting station, apang indi man ini makaapekto sang dako sa ila income.
Dugang pa sang Punong Barangay, nga wala man ini nagapamatuk ukon nagapabor sa pagpauntat sa e-sabong bangud may kanya-kanya ini nga bentaha kag disbentaha, apang sa iya nga barangay, wala man ini sang may nakita nga problema sang naga-operate pa ang e-sabong, bangud sa tabok lang ini sang Ivisan Police Station, gani napabilin ang kalinong kag katawhay sa lugar.
