ROXAS CITY – Ginakunsidera sa karon ni House Deputy Speaker Congressman Fredinil Castro ang opinyon kag suhestyon, ni anay DILG Secretary Mar Roxas sa pagpadalagan bilang senador sa 2019 midterm elections.
Sa interview sang Bombo Radyo Roxas kay Capiz 2nd district Congressman Fredinil Castro, ginkumpirma sini ang pag-nominate sa ila nga duha ni Congressman Carlo Nograles sang National Unity Party para magpadalagan sa pagka senador sa maabot nga eleksyon.
Apang suno sa kongresista nga wala pa ini nakadesisyon kun batunon ang ginatanyag sang nasambit nga partido, bangud kinahanglan pa sini nga kunsultahon ang iya mga constituents sa Capiz, mga lokal nga opisyal sang gobyerno sa probinsiya kalakip si anay interior secretary Mar Roxas.
Suno pa kay Castro nga daku nga bagay ang opinyon kag suhestyon sang mga Capizeño, bangud diri sini mahibaluan kun suportahan ini sa iya desisyon nga magsaka na sa Senado.
