PANITAN, CAPIZ – Ginkumpirma ni Kagawad Robert Chan Dela Torre nga ginbisitahan sang munisipyo kag Department of Public Works and Highways ang ginareklamo nga guba nga river control sa Sitio Pangpang, Barangay Cadio, Panitan, Capiz.
Sa interview sang Bombo Radyo Roxas kay Dela Torre, matuod ang ginpalab-ot nga reklamo sang isa sa mga residente nga indi na makalabay ang mga salakyan sa lugar kag delikado man para sa mga nagalakat nga tawo.
Suno kay Dela Torre, walo na ka tuig ang amo nga proyekto kag ginsiling sini nga palpak ang ubra sang DPWH.
Mensahe sini sa natungdan nga ahensya sang gobyerno nga dapat aksyonan na nga daan ang guba nga karsada kag river control bangud bangud 32 ka balay ang apektado kag ginatos ang tawo nga nagapauli sa nasambit nga lugar kun sa diin nabudlayan ang mga ini sa pang-adlaw-adlaw, lakip ang pagbyahe sang mga estudyante, pagdala sang produkto, pagkuha sang tubig, kag access sa emergency response.
– Interviewed by: Bombo Jessa Mae De Los Santos
