Nangin madinalag-on ang kampanya nga Oplan Biyaheng Ayos: Pasko 2025 sang Philippine Coast Guard sa probinsya sang Capiz kadungan sang Holiday Season.
Sa interview sang Bombo Radyo kay Senior Chief Petty Officer Arnel Nisola, Chief at Arms sang Philippine Coast Guard-Capiz, iya ginpahayag nga pamaagi sa hugot kag maid-id nga pagbantay sang ila nga mga katapo, nangin matawhay kag smooth ang dalagan sang mga operasyon sang mga sakayan pandagat kag mga pasahero sa tanan nga mga pantalan sa probinsya.
Suno kay Nisola, magluwas sa mga pantalan napabilin man ang kalinong kag katawhay sa mga baybayon. Wala sang may narekord nga kun ano man nga sahi sang mga insidente sa kalalawran.
Pahayag niya, nagdamo naman sang tuig 2025 ang mga pasahero nga nagaguwa-pasulod sa probinsya umpisa Disyembre 20, 2025 tubtob Enero 5, 2026 sa diin nga yara sa kabug-usan 5, 284 ang nagaguwa halin sa Capiz, kag yara naman sa kabug-usan 5, 157 ang nagapasulod sa probinsya.
Dugang pa sang natungdan, sa pihak sang madamo nga numero sang mga pasahero sa amo nga panahon sang yuletide season, mas nangin mabaskog ang ila nga mga kampanya agud nga mapabilin nga malinong kag matawhay ang palibot.
