ROXAS CITY – Nangin madinalag-on ang ginpatigayon nga Oplan Galugad ukon Greyhound Operations sang Philippine Drug Enforcement Agency VI kaupod ang mga tinawo sang Bureau of Jail Management Penology-Roxas City.
Sa interview sang Bombo Radyo kay Jail Senior Inspector Rodel Morales, Jail Warden sang BJMP-Roxas City, ginpahayag sini nga nangin maayo ang resulta sang nasambit nga operasyon.
Suno kay JSIP Morales, nagpatigayon sang random drug test sa mga personnel kag Person Deprived of Liberty ukon PDLs.
Dugang pa sini nga kadungan sang random drug testing, nag-conduct man sang inspeksyon sa mga pasilidad agud malikawan ang posible pagtago sang mga iligal nga droga kag mga kontrabando.
Wala naman sang narekober nga kontrabando kag iligal nga droga sa nasambit nga operasyon. Samtang, negatibo man ang resulta sang drug test sa mga personnel lakip na ang 25 percent sang mga PDLs nga nagpaidalom man sa drug testing.
Ginpasalamatan naman ni Morales ang kooperasyon sang mga personnel kag PDLs kag panugyan sini nga magsunod sa mga pagsulundan nga ginapatuman agud mapabilin ang kalinong kag katawhay sa pasilidad.
