ROXAS CITY – Nangin madinalag-on ang ginpatigayon nga Operation Greyhound ukon Oplan Galugad sa Bureau of Jail Management and Penology (BJMP) sa mga selda sang Person’s Deprived of Liberty (PDL) kaina sang aga.
Kaupod sang personnel sang Roxas City jail ang mga katapu sang Roxas City PNP nga may tuyo nga mangin hilway sa iligal nga droga ukon anuman nga iligal nga kontrabando ang pasilidad.
Ginpahayag ni SJO3 Edilia Fantilaga, deputy chief sang Roxas City Jail nga menor lamang nga mga bagay nga ginadumilian sa pasilidad ang natigayon nga makumpiskar sang mga otoridad sa nasambit nga operasyon.
Kalakip sa mga ginpangkumpiskar sa selda sang mga PDL’s ang ballpen, lapis, sudlay nga mataliwis, wiring kag cord, calculator, cellphone, baraha, lighter butong nga singit, toothbrush kag iban pa.
Gin-athag ni SJO3 Fantilaga nga wala ginapahanugutan ang toothbrush nga wala nautod, agud indi magamit sang iban nga may malain nga buko sa ila kaupdanan.
Aminado ang opisyal nga nagaagi sa maidid nga pagtsekyar sang mga jail guards ang ginapadala sa mga PDL’s, agud masiguro nga indi makalusot ang mga iligal nga kontrabando kasubong sang droga sa BJMP.
Nahibaluan nga may 265 ka mga PDL’s ang yara sa karon sa Roxas City Jail sa diin sa nasambit nga numero 49 diri ang kababainhan kag 182 ukon 68.8 porsyento ang nagapangatubang sang kaso may kaangtanan sa iligal nga droga.
