ROXAS CITY – Ginpaathag sang alkalde sang siyudad sang Roxas ang ginpapasar nga ordinansa sang Sangguniang Panlungsod may kahilabtanan sa plano nga pag-broadcast sa publiko sang ‘E-bulang’ ukon online-bulang nga gin-kwestiyon sang Sangguniang Panlalawigan sang Capiz.
Ang nasambit nga ordinansa amo ang City Ordinance No. 009-2020 ukon ‘ Ordinance Granting Franchise to United Association of Cockpit Owners and Operators of the Philippines, Incorporated to Broadcast and Data Streamed Cockfighting Activities and Derbies at Commercial Establishments and to Establish, Operate, and Maintain Off-site Cockpit Betting Station within the City of Roxas’.
Suno kay Mayor Ronnie Dadivas nga ang pagpapasar sang ordinansa ang wala paman nagapatimaan nga dalayon na gid nga mapatigayon ang online-bulang bangud nagapakita pa lamang ini nga wala sang nagpamalabag sa Roxas City council sa amo nga plano.
Ginpahayag pa sini nga pagausisaon man sang husto kun ang aplikante sang franchise ang may kapasidad sa pagpatigayon sini.
Bukas naman suno diri ang konseho sang siyudad sa pag-usisa kag pagtsekyar sang provincial council sang kaundan kag mga probisyon sang nasambit nga ordinansa.
