ROXAS CITY-Natalana nga mag-file sang petisyon ang pila ka mga Public Utility Jeepney (PUJ) drivers kag operators sa Land Transportation Franchising and Regulatory Board (LTFRB) para sa pagpasaka sang pletehan sa mga nagabiyahe nga mga PUJs sa probinsiya.
Sa interview sang Bombo Radyo kay Mr. Jobert Carandang, Presidente sang Hugpong Transport Piston-Capiz nga ginaduso sa karon sang mga PUJ drivers kag operators ang P15 fare rate increase kasunod sang pagpatuman sang 1 meter physical distancing kag 30 % capacity sa mga pampubliko nga salakyan.
Aminado si Carandang nga dako man ang mangin epekto sini sa mga pasahero apang kinahanglan man nga maghimo sang tikang ang sektor bangud nakita diri nga indi na bastante ang ila sini nga kita kun matabo.
Magluwas diri, nagapadayon man nga nagatinaas sang presyo sang gatong sa pungsod.
Samtang ginatugyan nalang ni Carandang sa lebel sang LTFRB kun ano ang mangin desisyon sang talatapan.
Mahibaluan nga ang pag-implementar sang 1 meter physical distancing kag 30% passenger capacity sang DOTr kag LTFRB ang kabahin sang health minimum protocols agud malikawan ang paglapta sang COVID-19.
