Ginkumpirma sang Department of Budget and Management (DBM) nga may yara sang P238 billion nga pondo ang gobyerno agud masabat ang epekto sang oil shock sa pungsod.
Sa hearing sang LEAD Committee sa Kamara, ginpahayag ni Acting Budget Secretary Rolando Toledo nga ang pondo magahalin sa 2026 budget kag sa nagapadayon nga appropriations sang administrasyon ni Marcos.
Ginhatagan pagtamod ni Toledo nga tutukan sang gobyerno ang targeted assistance sa baylo sang malapnagon nga subsidy agud masiguro nga makalab-ot ang ayuda sa mga sektor nga pinaka-vulnerable sa krisis.
Sa subong, P3.5 billion ang ginpagwa para sa transportasyon kag P10 billion para sa presidential assistance sa sektor sang agrikultura kag pangisdaan.
Magluwas sa transportasyon kag pagkaon, padayon man ang pagpanagtag sang bulig pinansyal pinaagi sa programa sang AICS kag suporta para sa mga OFWs.
Ginpasiguro naman sang Department of Budget and Management sa mga mamalidha sa idalum nanday Speaker Bojie Dy III kag Representative Miro Quimbo nga handa ang gobyerno nga palaparon ang mga safety-net programs kaangay sang (Tulong Panghanapbuhay sa Ating Disadvantaged/Displaced Workers) ukon TUPAD kon maglala ang sitwasyon sa pangkalibutanon nga merkado sang langis.
