ROXAS CITY, CAPIZ- Ginpatpat sang isa ka nurse ang importansya sang pag-amlig sa kaugalingon nga Mental Health, agud makalikaw sa nagkalain-lain nga mga balatian.
Sa interview sang Bombo Radyo kay Jasmin Gallaza-Rabe, Nurse II sang Capiz Provincial Health Office, iya ginpahayag nga ang pag-amlig sa kaugalingon nga mental health, amo ang isa ka epektibo nga paagi agud malikawan nagkalain-lain nga balatian, indi lamang sa pisikal kundi pati man sa emosyonal kag mental nga aspeto.
Suno kay Rabe, subong nga bulan sang Oktubre, ginaselebrar ang World Mental Health Day & National Mental Health Week sa idalom sang tema nga “Mental Health in Humanitarian Services” sa diin nga tinutuyo sang amo nga programa ang maghatag sang ihibalo sa mga pumuluyo may kaangtanan sa paghatag man sang bulig sa mga nagasupreher sang balatian sa mental kag emosyonal nga aspeto.
Pahayag pa nya, ang mental health amo ang isa ka estado sang kaisipan kag paghuna-huna. Kun may yara sang tawo nga pirme maluya, wala sang gana, ukon naga-antos sang kahadlok, posible ini nga senyales sang mental health concern.
Dugang pa sang natungdan, mahimo nga magpakig-angot ang publiko sa mga natungdan nga mga health personnel kun kinahanglan sang bulig ukon counseling. May yara sang mga programa pareho sang psychological first aid, forums, kag awareness campaigns.
Nahibaluan nga ang probinsya sang Capiz, may yara sang Mental Health Ordinance No. 392 series of 2024 sa diin nga nagapatigayon sang mga programa may kaangtanan sa pagtapna kag paghatag sang bulig may kaangtanan sa mental health.
Interviewed by Bombo Jessa Mae Siman De Los Santos
