ROXAS CITY – Ginpadangat sa ospital ang isa ka ginang matapos maaksidente ang ila ginasakyan nga motorsiklo sang mister sa Barangay Balijuagan, sining syudad.
Ginpahayag ni Antonio Manican, driver sang motorsiklo nga magapauli na sila sa banwa sang Mambusao sang asawa nga si Rosalie Manican, sang may nagtabuk nga isa ka babaye sa Barangay Balijuagan.
Apang sa wala ginalauman, nagtuyo nga magbalik sa pihak nga karsada ang babaye nga nakilala nga si Maricel rason nga naalang alang sa ginamaneho nga motorsiklo si Manican.
Sa tuyo nga malikawan ni Manican ang babaye, ginkabig sini sa pihak nga linya ang manubela, apang nasideswiped sa gihapon si Maricel nga nagpalangurog sa tuman nga kahadluk.
Bangud sa impact sang pagkabunggo, natumba ang motorsiklo kag na-angkon sang madamo nga samad sa lawas ang asawa ni Manican nga si Rosalie nga gilayon gindala sa ospital agud madapatan sang nagakaigo nga pagbulong.
