Ginalauman nga maisumite sa adlaw sang Lunes, Marso 17 ang eksplenasyon sang grupo sang gobyerno sa mandu sang Korte Suprema nga i-explain ang pag-aresto, pagdetine kag pagtugyan kay anay Presidente Rodrigo Duterte sa International Criminal Court (ICC).
Ini ang ginalauman nga isumiter ni Solicitor General Menardo Guevarra nga amo ang nagbaton sang ginserbe nga kopiya sang order subong nga hapon sang Biyernes, Marso 14.
Matandaan nga unod sang show cause order nga gin-isyu sang SC sadtong Huwebes sang gab-i ang order to explain matapos aksyunan ang 3 habeas copus petition nga ginfile sang mga bata sang anay Presidente nga nanday Davao City Mayor Sebastian “Baste” Duterte kag Veronica “Kitty” Duterte sadtong Marso 12.
Ginhatagan sang korte ang gobyerno sang 24 ka oras agud magsabat diri, apang bangud sa natabuan nga weekend ang deadline, mahimo nga maisumiter sang mga respondent ang ila nga explanation sa Lunes.
Magluwas kay Guevarra, kalakip pa sa mga respondent amo sanday Executive Secretary Lucas Bersamin, Department of the Interior and Local Government (DILG) Secretary Jonvic Remulla, Philippine National Police (PNP) Chief General Rommel Marbil, PNP-CIDG chief Gen. Nicolas Torre III , Foreign Affairs Secretary Enrique Manalo, Armed Forces of the Philippines (AFP) Chief of Staff Romeo Brawner Jr., Executive Director of the Philippine Center on Transnational Crime (PCTC) Undersecretary Lt. Gen. Antonio Alcantara, Capt. Johnny Gulla kag Bureau of Immigration (BI).
