ROXAS CITY – Nagapati ang alkalde sang siyudad sang Roxas nga indi na kinahanglan pa sang isa ka ordinansa agud mabuligan ang mga Barangay Service Workers, Barangay Health Workers, kag Barangay Tanods sa mga kabaranggayan.
Ini ang ginpahayag ni City Mayor Ronnie Dadivas sang mainterview sang Bombo Radyo.
Mahibaluan nga ginaduso karon ni City Councilor Jericho Celino ang isa ka ordinansa sa konseho sang siyudad nga may katuyuan nga mabuligan ang nasambit nga mga indibidwal nga may dako nga kontribusyon sa tagsa ka mga barangay.
Apang panindugan sang alkalde, indi na kinahanglan ang isa ka ordinansa agud mapatuman ini bangud kalakip sa prayoridad sang iya nga administrasyon ang paghatag sang bulig sa mga BSW’s, BHW’s kag barangay tanods.
Sa pagkamatuod suno kay Dadivas nga may ginpain na ini nga pondo para sa nasambit nga programa.
Suno diri nga indi niya pagpabay-an ang nasambit nga mga indibidwal bangud isa ini sa iya nga ginpasalig sang tion nga nagakampanya pa lamang siya sang nagpapili bilang alkalde.
Kuntani suno kay Dadivas, nagpangusisa anay ukon nagkonsulta ang nagaduso sang nasambit nga ordinansa sa iya nga talatapan agud nahibaluan sini nga may yara sang programa ang alkalde para diri.
Gindugang pa ni Dadivas nga iya man ini nga ginpresentar sa ginpatigayon nga Executive Legislative Agenda (ELA) sang gobyerno sang siyudad apang napaslawan diri nga makatambong si Councilor Celino.
Apang hugot ang pagpati ni Dadivas nga maayo man ang katuyuan ni Celino nga magpapasar sang isa ka ordinansa para sa amo nga programa apang natuunan lamang nga isa man ini sa priority program sang alkalde.
