ROXAS CITY – Matigdas ang panindugan sang tagpamaba sang Capiz Police Provincial Office (CPPO) nga bawal ukon ginadumilian ang paghampang sang mobile legend sang naga-duty nga mga pulis.
Ini ang nangin reaksyon ni Police Executive Master Sergeant Donna Asmod sa impormasyon nga nabaton sang Bombo Radyo nga may mga pulis nga masako pa sa paghampang sa ila mga cellphone sa baylo nga hatagan atensyon ang ginadangup nga problema ukon reklamo sang mga pumuluyo.
Ginpahayag ni Asmod ang isa ka alagad sang kasuguan nga madakpan nagahampang sang anuman nga games sa iya cellphone samtang on-duty ini, ang nagalapas sa breach of discipline, bangud indi na ini makahimo sang iya obligasyon kag trabaho.
Aminado ang opisyal sang nagligad nga administrasyon may nagpalab-ot sa ila sang reklamo angut sa amo nga isyu kag gilayon ini nga gin-aksyunan agud indi pagpamarisan.
Suno pa kay Asmod ginatinguhaan karon sang pamunuan sang pulisya nga makaayo ang imahen sang kapulisan bangud indi lipod sa tanan ang madamo nga kontrobersiya nga gindalahigan sang mga otoridad sang nagliligad nga mga inadlaw.
Kinahanglan man kun naka-uniporme kag on-duty na ang isa ka pulis, likawan sini nga mag-uyat sa iya cellphone, labi na kun indi man lamang kinahanglanon, agud
indi matentar nga maghampang sang games.
Liwat ginpa-intiende ni Asmod ang mga kaupdanan nga pulis pananglitan nga nalipat sila sa slogan ni Police Col. Julio Gustilo nga ‘’Serve the People with a Happy Heart’’.
Ginpahanumdum pa sini ang kapulisan nga indi lamang isa ka sala ang nakomiter sang pulis sa paghampang sang games sa cellphone.
Samtang suno kay Asmod nga bukas ang CPPO sa pagbaton sang report kag reklamo gikan sa mga pumuluyo agud matadlong ang sala nga ginahimo sang salawayon nga mga pulis.
