Ginpatpat sang Capiz Electric Cooperative Inc. nga ang paghulag sang power rate sang kuryente ang epekto sa pagtaas sang presyo sang gatong.
Sa interview sang Bombo Radyo kay Engineer Edgar Diaz, General Manager sang Capiz Electric Cooperative Inc.,iya ginpahayag nga ang pagtaas sang power rate subong nga bulan sang Marso ang bangud sang pagtaas man sang mga pass-on charges kaangay sang generation charges, transmission charges kag vat charges.
Suno kay Diaz, 25% sang kuryente nga ginagamit sang ila talatapan ang gikan sa geothermal energy samtang ang nabilin nga 75% ang halin sa coal nga isa ka imported nga gatong.
Pahayag pa niya, ang padayon nga tension sa Middle East ang nakaapekto indi lang sa cost of power sang Capiz Electric Cooperative kundi mangin sa iban pa nga mga balaklon.
Naghingyu man ang natungdan sa Energy Regulatory Commission manduan ang mga Generation companies kag transmission companies nga tugutan ang mga electric cooperative sang 4-payment system agud mabuhinan ang mga pass-on charges nga ginabayaran sang mga konsumidor.
Nagapanawagan man ini sa publiko nga magkooperar sa pagkinot sang kuryente agud makabulig nga makapiyan-piyan sang gastos sa pang-adlaw-adlaw ilabi na sa krisis nga ginapangatubang sang pungsod sa padayon nga pagtaas sang presyo sang gatong bangud sa kinagamo sa Middle East.
