ROXAS CITY – Daku nga palamangkutanon sa kura paroko kag mga parishioners sang San Pedro Calungsod mission station sa Barangay Mianay, Sigma, ang pagpangawat sang wala pa makilala nga suspek sa tabernakulo nga yara sa atubang sang altar.
Ginkatingala ni Monsignor Butch Abalajon sang makita nga medyo nakabukas ang pirtahan sang simbahan., rason nga iya ini ginpalapitan kag gintsekyar.
Apang amo na lamang ang kakibot sang kura paroko sang makita nga ginwasak ang padlock sang pirtahan gamit ang metal cutter.
Gilayon nga gintsekyar ni Msgr. Abalajon ang mga kagamitan sang simbahan kag nadismaya sang mahibaluan nga ginkuha sang makawat ang tabernakulo.
Matandaan nga ini na ang ikaduha nga insedente sang pagpangawat nga natabo sa mga simbahan sa probinsiya sang Capiz.
